Galego 
Español 
English (UK) 
Dublín, 20 de marzo de 2025 – A Asociación de Concellos do Camiño Inglés inaugurou na igrexa de St. James, en Dublín, unha estatua do Apóstolo Santiago, nun acto que reuniu preto dun cento de persoas, entre representantes institucionais, membros da Camino Society e peregrinos.
A peza, unha escultura do artista galego Armando Martínez, foi doada pola Asociación co obxectivo de reforzar os lazos históricos entre Galicia e Irlanda e de converter esta igrexa nun novo punto de referencia para os peregrinos do Camiño Inglés. O evento contou coa presenza do embaixador de España en Irlanda, Ion de la Riva Guzmán de Frutos; o presidente de honra da Asociación, Manuel Mirás; e o párroco de St. James, o Padre Martin.
Unha doazón con fondo significado xacobeo
Na súa intervención, Manuel Mirás destacou o valor simbólico da escultura e o papel do Apóstolo Santiago na historia e na cultura de ambos países:
“Esta estatua, situada nun lugar tan significativo, será un punto de referencia para os peregrinos e un símbolo compartido entre Galicia e Irlanda. A súa instalación reforza os lazos de amizade e pon de manifesto o valor do Camiño de Santiago ao longo da historia.”
O embaixador español, Ion de la Riva, lembrou a súa primeira visita a St. James e bromeou cos asistentes ao confesar que a imaxe do Apóstolo que xa había na igrexa era demasiado pequena e que desexaba unha máis grande e representativa, acorde coa importancia do templo e do santo.
Pola súa banda, o párroco de St. James, o Padre Martin, ofreceu unha homilía na que destacou o espírito do Camiño como un espazo de igualdade e fraternidade:
“Cando camiñamos polo Camiño, todas as diferenzas desaparecen. Non importa a nosa idade, xénero, idioma ou procedencia; todos somos peregrinos intentando navegar pola vida.”
O acto serviu tamén como despedida de Turlough O’Donnell como presidente da Camino Society, quen reivindicou as rutas xacobeas como espazos de paz e entendemento. Na súa intervención, asegurou que “todos somos un e camiñaremos xuntos en paz”, poñendo en valor a importancia do Camiño como vía de encontro entre culturas.
A xornada rematou cun xantar de confraternización nun pub local, no que se celebrou o décimo aniversario do centro de información da Camino Society, un espazo xestionado por voluntarios e dedicado á orientación dos peregrinos en Irlanda. Con esta iniciativa, a Asociación de Concellos do Camiño Inglés reafirma o seu compromiso coa difusión e fortalecemento do Camiño Inglés, consolidando a conexión entre Galicia e Irlanda a través da historia e da tradición xacobea.
