Cidade Real únese ao Camiño Inglés nun irmandamento histórico

A Igrexa de Santiago de Cidade Real acolleu este sábado a sinatura do convenio de irmandamento entre o Camiño de Santiago Manchego e o Camiño de Santiago Inglés, un acto que reforza a rede de rutas xacobeas históricas e proxecta novas oportunidades de colaboración cultural e turística entre territorios.

O acordo foi asinado por Yolanda Torres, concelleira de Promoción Económica do Concello de Cidade Real, coa presenza da concelleira de Turismo, Cristina Galán, o presidente da Asociación do Camiño Manchego, Francisco Caña, os cregos do templo e Manuel Mirás Franqueira, presidente da Asociación de Concellos do Camiño Inglés, quen participou como convidado de honra.

O acto tivo un marcado carácter simbólico, xa que devolve a Cidade Real o seu papel como enclave xacobeo dentro do mapa de rutas a Santiago. Cristina Galán destacou que moitos veciños descoñecen este patrimonio histórico, e sinalou que a colocación de vieiras en distintos puntos da cidade servirá como recordatorio visual desta recuperación.

Francisco Caña explicou a orixe do Camiño Manchego, documentado desde o ano 1212, cando os cruzados que acompañaron a Afonso VIII na batalla das Navas de Tolosa regresaban a Europa pasando por Compostela. A ruta parte de Cidade Real e atravesa Toledo, Ávila e Zamora antes de enlazar co Camiño Sanabrés cara a Santiago de Compostela.

Unha ponte entre rutas xacobeas con historia compartida

Durante a súa intervención, Manuel Mirás Franqueira salientou as coincidencias entre ambas rutas: o seu pasado medieval, o esquecemento institucional e a recuperación grazas ao esforzo de asociacións e administracións locais. En palabras do presidente da Asociación de Concellos do Camiño Inglés, este irmandamento “trascende o acto simbólico; é un paso real cara a unha rede de camiños interconectados, onde cada territorio achega a súa identidade e a súa historia ao proxecto común do Camiño de Santiago”.

Mirás lembrou que o Camiño Inglés foi a ruta máis utilizada durante a Idade Media polos peregrinos do norte de Europa, que chegaban por mar desde o Reino Unido e Irlanda. Hoxe, sinalou, esta vía renace con forza grazas ao traballo conxunto entre territorios que cren no potencial cultural, turístico e espiritual do Camiño.

O Concello de Cidade Real agradeceu a colaboración de todas as persoas implicadas e expresou o seu compromiso con esta alianza, que abre novas oportunidades de dinamización local a través do turismo patrimonial e a proxección internacional do seu legado xacobeo. Con esta sinatura, o Camiño Inglés suma un novo aliado que contribúe á súa consolidación como unha das grandes rutas do presente e do futuro.